Kini nasayran atol sa gipahigayong dayalogo tali sa duha ka grupo niadtong Nobyembre 25 sa buhatan sa Ummah Fi Salam kinsa mao ang nahimong tigpasayon sa maong panagtagbo. Si Hawani mao ang gipadala ni Mayor Sammy Co aron nga morepresentar sa CRM Council. 

Una na nga nagpahigayon ang mga maapektaran nga gagmay’ng mananagat sa usa ka konsultasyon sa ilang mga kaubanan niadtong Septyembre 9 didto sa Old Slaughter House sa Barangay Dumagok, Pagadian City kabahin sa ilang kabalaka nga ideklara ang duha ka dapit isip parte sa MPA.

Gani sa maong panagtigom namugna ang usa ka sulat-petisyon sa mga gagamay nga mananagat nga gipadala ngadto sa buhatan sa Mayor ingon man sa tanang mga konsehales ning dakbayan diin ilang gisaysay ang ilang mga kabalaka sa kapanginabuhian kon ugaling mahinayon ang maong plano.

Ang maong sulat-petisyon gipirmahan sa kapin 500 ka mga mananagat ug sa ilang mga pamilya gikan sa walo ka mga Coastal Barangays nga mao ang Muricay, San Pedro, Santiago, Kawit, Dumagoc, Bomba, Poloyagan ug Barangay White Beach.

Niadtong Nobyembre 25, gipaneguro ni Hawani nga bugtong ang DawDaw Island lamang ang nahilakip sa ilang MPA Plan ug iyang gikalipay ang pagpakabana sa mga gagmay nga mananagat sa mao nga issue tungod sa dili madugay mahitabo gayud ang ilang gikabalak-an kon wala sila magkahiusa sa baruganan ug lihok.

Apan iyang gidasig ang maong grupo nga mas palig-unon pa ang ilang panaghugpong aron nga mamahimo silang makababag sa umaabot nga plano tungod sa dako ang posibilidad nga sila modaog kung sila makigbisog. 

Dugang pang gipahayag ni Hawani nga ang iyang pagdapig anaa sa mga mananagat tungod kay siya naggikan usab sa pamilyang mananagat ug siya mipasalig sa iyang suporta ngadto sa maong grupo.

Sa katapusan, nakauyunan sad sa duha ka partido nga organisahon sa mga gagmay’ng mananagat ang ilang mga kaugalingon ug magmugna sa usa ka plano nga makatabang diha sa gobyerno aron sa pagproteher sa kadagatan batok sa mga illegal nga panagat sama sa paggamit sa dinamita ug lain pang pamaagi nga makadaot sa mga lusay ug uban pa.

Nasayran usab nga ang maong issue napasaka na ngadto sa Interfaith Forum for Solidarity and Peace ug gitahasana ng Ummah Fi Salam sa pagtuon sa maong issue ug pagpangita ug pamaagi aron nga kini mahatagan ug solusyon hinungdan nga namugna ang maong dayalogo.