"Ang Ginoo nga atong Dios matarung, apan puno pa kita sa kaulaw. Nagbuhat kitang tanan sumala sa atong gusto ug nagpadayon pagkalat sa atong kaugalingong daotan nga mga dalan Miatubang kita ngadto sa laing mg adios ug nagbuhat kita sa mga butang nga kontra sa Ginoo." (Baruc 1,15.21.)
Mga kaigsoonan ko sa Diosesis sa Pagadian,
Kinsa may makalimud nga nagpadayon ang salawayong kultura sa limbong? Dili ba gipangandaman gayud ang lainlaing pamaagi sa paglimbong ug pagpaneho sa piliay sa Mayo 14, 2007? Dili ba sayo kaayong gidapit ang mga lideres, lakip ang mga GSK, sa pag-apil sa inabtik ug sistematikong pagmaneho sa paglingla – ginamit ang salapi ug hulga – sa mga botante ilabi na gayud sa mga kabus? Ngano man nga sa bisperas sa piliay ang naandang kamingaw sa kagabhion nabalda man sa kasikas sa mga tawo – mga hamtong ug mga batan-on – nga nagpa-uraray sa kadalanan o nagpundok-pundok atubangan sa gitudlo nga kabalayan? Tataw ang tubag niini ug nasayran na ninyong tanan! Apan unsa may atong ikasulti bahin niini? Dili ba masulob-on ug makalolooy gayud nga mipasulabi ang dautang kahimtang inay ang katarung ug kamatuoran? Dili ba gud masulob-on nga ang daghang nagpalingla dili lang kay nahimong biktima apan usab nahimo kaabin sa mahugaw ug salawayong kalihokan nga nagpasipala sa balaan ug tawhanong katungod sa pagbotar? Kaloy-an unta sila sa Dios, nga maoy maghukom kanila!
Kinsa may mahiluna tungod sa piliay nga nahimo uban sa hilabihang kahugaw ug kalaw-ay? Ngano man pananglit nga ang mga "watcher" sulod sa presinto nahimo man hinoong tig-aponmg ug tigpaniid unsay gisulat sa botante aron makasenyas sila sa kaubang "watcher" didto sa gawas? Kinsa may mahiluna nga nawad-an man gayud sa kasekroto ang sagradong balota dinhi sa siyudad sa Pagadian ingon man sa nagkalainlaing lungsod a atong diosesis? Ngano man nga daghang may opisyal nga katungdanan sa mga presinto wala may igong pagpakabana ug pagpanumbaling niini sa epektibong paagi? Makapangutanan tag kaabin ba kaha sila sa salawsayong buhat. Makauulaw gayud kini nga panamastamas sa domokrasya! Dili ba kitang tanan gigasahan man sa Dios og salabutan aron makasabut sa kamatuoran? Dili ba gihatagan man kitag kabubut-ong gawasnon aron makapili sa katarung? Dili ba may tawhanong tang katungod ug katungdanan sa pagtahud ug pagsunod sa atong tanlag, nga maoy nagpadayag sa Diosnong balaud sa atong kaugalingon? Nasayud ta nga dautan ang paglimbong! Busa tulisokon gayud ang limbongan sa kaugalingong tanlag matag gutlo ug matag adlaw sa iyang kinabuhi! kay kinsa may makalikay sa tingog sa tanlag – nga maoy tingog sa Dios sulod sa atong kahiladman? Mahiluna ba kaha sa tinuoray si kinsa man ang nakasala batok sa Dios, bisan sila kansang konsiyensya naminhod na ug kansang kasingkasing nagahi na gumikansa kaanad sa pagkadautan? Andam ba kaha sila sa pag-atubang sa Dios sa hustisya ug katarung? Hinaut nga madutlan pa gihapon unta sila sa Pulong sa Kinabuhi! Hinaut nga mabati pa unta nila ang kalooy sa Dios aron magbag-o sa dili pa ang katapusang pagpanudya!
Sila nga nagpalingla sa salapi, angayan pa bang molaum ug mopasabot og maayong pagdumala gikan sa politikanhong mga pangulo nga nagpahalipay kanila? Tungod kay napasuborno man sila, may katungod pa ba sila sa pagmahay kon ang ilang gituboy dili mohatag og histo nga pag-alagad? Sa usa ka demokrasya batakang katungod sa usa ka lumolupyo ang gawasnong pagpili sa mga tugdumala sa katilingban. Balaan ang maong katungod ug dili mahimong isurender. Dili mahimong ibaligya. Dili mahimong ihatag nga pinugos? Mao man gain nga ato ning ginganlan og "inalienable right".
Kinsa man gain tong makadaug pinaagi sa limbong angayan bang magpasalamat sa Dios? Angayan bang magpamisa? Dili gayud! Kay unsa may nagpahiping katuyoan sa maong pagpasalamat? Dili gayud! Kay unsa may nagpahipiong katuyoan sa maong pagpasalamat? Ang sukwahi bang pagbati, panghunahuna o panglantaw nga giubanan ug gitabangan sila sa Dios sa ilang pagpanlimbong aron makaangkon silag kadaugan? Dili ba hinoon kini dobleng insulto sa Dios sa Katarung nga human Siya pasipag-I pinaagi sa organisadongh pagpanikas, butangbutangan pa gayud siya nga kaabin sa salawayong tinguha ug sa buhat nga dakong eskandalo? Dili gayud angayang magpasalamat sa Dios ang tanang nanlimbong, bisan sila nga kapildihan ray naangkon.
Kining pagpadayag usa ka protesta batok sa nagkagrabeng kultura sa limbong. Usa kini ka protesta batok sa daotan ug immoral nga binuhatan sa mga tawo nga nakapasamot sa ngil-ad nga kahimtang ug nakaangin sa daghang kaigsoonang inosente, ilabi na ang kabataan ug mga kabus nga ilang gilingla ug giduladulaan.
Sa pikas bahin, usa usab kini ka hagit ug awhag sa mga tawong mayo og kabubut-on aron mangita og mopasiugdad epektong mga pamaagi sa pagtubag sa atong suliran. Katungdanan natong tanan ang pag-atiman niini. Dili kini sayon. Dili madalidali ang paggun-ob sa dautan. Dili madalidali ang pagpaundang sa kultura sa limbong. Apan importanter gayud nga mapulihan ug kultura sa kamatuoran ug katarung. May kaakohan kitang tanan sa pag-aninaw unsay angay nga mga lakang nga pagahimoon alang sa mayo ug bag-ong pamolitika.
Angay nga ilhon og pasalamatan ang mgta kandidato nga naningkamot sa pagbarug sa mga prinsipyo matarung ug wala magpadani sa pagpamalit og boto o sa ubang pamaagi sa paglimbong. Bulahan kamo tungod sa inyong maayong tinguha alang sa hustisya ug katarung bisan pa og wala mosangput sa politikanhong kadaugan ang inyong paningkamot. Nakadaug na kamo og malinawon nga tanlag. Nakadaug na kamo og dugang pagtahud sa katawhan.
Angay usab nga ilhon ug pasalamatan ang daghan kaayong mga kaigsoonan nga miboluntaryo aron malinawon ug hapsaqy ang dagan sa piliay. Ilabina sila nga mitubag sa awhag sa Social Action sa Dioseses nga nakiglambigit sa NAMFREL ug PPCRV. Bulahan bulahan kamo kay sa walay pag-kwenta sa kaugalingon, misakripisyo ug milihok kamo alang sa kaayohan sa tanan. Mainyo unta ang Gingharian sa Dios!
Kining bag-ong kasinatian himoon natong ang-ang sa pagkat-on. Himoon ta kining puhonqan ug bag-ong sinugdanan sa paglihok aron mabag-o ang atong mga GSK u gang mga kapunongan sa simbahan. Busa giawhag ang tanang parokya pinangulohan sa mga Kura Paroko ug sa mga ‘Parish Pastoral Council’ nga mahimong pagbalik-lantaw sa nangagi aron madugangan ug mapalawman ang kaamgohan. Giawhag usab sila nga maningkamot sa paghulma og programa alang sa dugang mapadayonong pag-umol sa mga GSK, ilabina alang sa mga lideres niini. Kinsa tong mga lederes sa Simbahan o GSK nga nalambigit sa limbong sa miaging piliay kinahanglan nga papahulayon na lang sa ilang pagkapangulo. Hagit nato ang pagpangita, pagpatumaw ug pag-umol og bag-ong mga lideres nga maayong kinaiya, may kahibalo ug kahanas, ug sulundog kinabuhi isip tinun-an ni Kristo.
Hinaut nga ang Dios sa Katarung kanunayng magauban kanato. Hinaut nga ang mahal nga Birhen Maria, inahan sa mga GSK, mag-ampo alang kanato.
Pinermahan
+Emmanuel T. Cabajar, C.Ss.R.
Obispo sa Pagadian
Mayo 15, 2007
(0 vote)